Amrit Sanjeevani Dhanvantari Stotram

namo namo viśvavibhāvanāya
namo namo lokasukhapradāya |
namo namo viśvasṛjeśvarāya
namo namo namo muktivarapradāya || 1||

namo namaste'khilalokapāya
namo namaste'khilakāmadāya |
namo namaste'khilakāraṇāya
namo namaste'khilarakṣakāya || 2||

namo namaste sakalārtrihartre
namo namaste virujaḥ prakartre |
namo namaste'khilaviśvadhartre
namo namaste'khilalokabhartre || 3||

sṛṣṭaṃ deva carācaraṃ jagadidaṃ brahmasvarūpeṇa te
sarvaṃ tatparipālyate jagadidaṃ viṣṇusvarūpeṇa te |
viśvaṃ saṃhriyate tadeva nikhilaṃ rudrasvarūpeṇa te
saṃsicyāmṛtaśīkarairhara mahāriṣṭaṃ ciraṃ jīvaya || 4||

yo dhanvantarisaṃjñayā nigaditaḥ kṣīrābdhito niḥsṛto
hastābhyāṃ janajīvanāya kalaśaṃ pīyūṣapūrṇaṃ dadhat |
āyurvedamarīracajjanarujāṃ nāśāya sa tvaṃ mudā
saṃsicyāmṛtaśīkarairhara mahāriṣṭaṃ ciraṃ jīvaya || 5||

strīrūpaṃ varabhūṣaṇāmbaradharaṃ trailokyasaṃmohanaṃ
kṛtvā pāyayati sma yaḥ suragaṇānpīyūṣamatyuttamam |
cakre daityagaṇān sudhāvirahitān saṃmohya sa tvaṃ mudā
saṃsicyāmṛtaśīkarairhara mahāriṣṭaṃ ciraṃ jīvaya || 6||

cākṣuṣodadhisamplāva bhūvedapa jhaṣākṛte |
siñca siñcāmṛtakaṇaiḥ ciraṃ jīvaya jīvaya || 7||

pṛṣṭhamandaranirghūrṇanidrākṣa kamaṭhākṛte |
siñca siñcāmṛtakaṇaiḥ ciraṃ jīvaya jīvaya || 8||

dharoddhāra hiraṇyākṣaghāta kroḍākṛte prabho |
siñca siñcāmṛtakaṇaiḥ ciraṃ jīvaya jīvaya || 9||

bhaktatrāsavināśāttacaṇḍatva nṛhare vibho |
siñca siñcāmṛtakaṇaiḥ ciraṃ jīvaya jīvaya || 10||

yāñcācchalabalitrāsamuktanirjara vāmana |
siñca siñcāmṛtakaṇaiḥ ciraṃ jīvaya jīvaya || 11 ||
kṣatriyāraṇyasañchedakuṭhārakararaiṇuka |
siñca siñcāmṛtakaṇaiḥ ciraṃ jīvaya jīvaya || 12||

rakṣorājapratāpābdhiśoṣaṇāśuga rāghava |
siñca siñcāmṛtakaṇaiḥ ciraṃ jīvaya jīvaya || 13||

bhūbharāsurasandohakālāgne rukmiṇīpate |
siñca siñcāmṛtakaṇaiḥ ciraṃ jīvaya jīvaya || 14||

vedamārgaratānarhavibhrāntyai buddharūpadhṛk |
siñca siñcāmṛtakaṇaiḥ ciraṃ jīvaya jīvaya || 15||

kalivarṇāśramāspaṣṭadharmarddyai kalkirūpabhāk |
siñca siñcāmṛtakaṇaiḥ ciraṃ jīvaya jīvaya || 16||

asādhyāḥ kaṣṭasādhyā ye mahārogā bhayaṅkarāḥ |
chindhi tānāśu cakreṇa ciraṃ jīvaya jīvaya || 17 ||

alpamṛtyuṃ cāpamṛtyuṃ mahotpātānupadravān |
bhindhi bhindhi gadāghātaiḥ ciraṃ jīvaya jīvaya || 18 ||

ahaṃ na jāne kimapi tvadanyat
samāśraye nātha padāmbujaṃ te |
kuruṣva tadyanmanasīpsitaṃ te
sukarmaṇā kena samakṣamīyām || 19 ||

tvameva tāto jananī tvameva
tvameva nāthaśca tvameva bandhuḥ |
vidyāhināgārakulaṃ tvameva
tvameva sarvaṃ mama devadeva || 20||

na me'parādhaṃ pravilokaya prabho'-
parādhasindhośca dayānidhistvam |
tātena duṣṭo'pi sutaḥ surakṣyate
dayālutā te'vatu sarvadā'smān || 21||

ahaha vismara nātha na māṃ sadā
karuṇayā nijayā paripūritaḥ |
bhuvi bhavān yadi me na hi rakṣakaḥ
kathamaho mama jīvanamatra vai || 22||

daha daha kṛpayā tvaṃ vyādhijālaṃ viśālaṃ
hara hara karavālaṃ cālpamṛtyoḥ karālam |
nijajanaparipālaṃ tvāṃ bhaje bhāvayālaṃ
kuru kuru bahukālaṃ jīvitaṃ me sadā'lam || 23||

klīṃ śrīṃ klīṃ śrīṃ namo bhagavate
janārdanāya sakaladuritāni nāśaya nāśaya |
kṣrauṃ ārogyaṃ kuru kuru | hrīṃ dīrghamāyurdehi svāhā || 24||

|| phalaśrutiḥ||

asya dhāraṇato jāpādalpamṛtyuḥ praśāmyati |
garbharakṣākaraṃ strīṇāṃ bālānāṃ jīvanaṃ param || 25||

sarve rogāḥ praśāmyanti sarvā bādhā praśāmyati |
kudṛṣṭijaṃ bhayaṃ naśyet tathā pretādijaṃ bhayam || 26||

|| iti sudarśanasaṃhitoktaṃ amṛtasañjīvanadhanvantari stotram ||