Shri Gayatri Atharvashirsham Stotram

শ্রীগণেশায নমঃ ॥

নমস্কৃত্য ভগবান্ যাজ্ঞবল্ক্যঃ স্বযং পরিপৃচ্ছতি
ত্বং ব্রূহি ভগবন্ গাযত্র্যা উত্পত্তিং শ্রোতুমিচ্ছামি ॥ ১॥

ব্রহ্মোবাচ ।
প্রণবেন ব্যাহৃতযঃ প্রবর্তন্তে তমসস্তু পরং জ্যোতিষ্কঃ পুরুষঃ স্বযম্ ।
ভূর্বিষ্ণুরিতি হ তাঃ সাঙ্গুল্যা মথেত্ ॥ ২॥

মথ্যমানাত্ফেনো ভবতি ফেনাদ্বুদ্বুদো ভবতি বুদ্বুদাদণ্ডং ভবতি
অণ্ডবানাত্মা ভবতি আত্মন আকাশো ভবতি আকাশাদ্বাযুর্ভবতি
বাযোরগ্নির্ভবতি অগ্নেরোঙ্কারো ভবতি ওঙ্কারাদ্ব্যাহৃতির্ভবতি
ব্যাহৃত্যা গাযত্রী ভবতি গাযত্র্যাঃ সাবিত্রী ভবতি সাবিত্র্যাঃ
সরস্বতী ভবতি সরস্বত্যা বেদা ভবন্তি বেদেভ্যো ব্রহ্মা ভবতি
ব্রহ্মণো লোকা ভবন্তি তস্মাল্লোকাঃ প্রবর্তন্তে চত্বারো বেদাঃ সাঙ্গাঃ
সোপনিষদঃ সেতিহাসাস্তে সর্বে গাযত্র্যাঃ প্রবর্তন্তে যথাঽগ্নির্দেবানাং
ব্রাহ্মণো মনুষ্যাণাং মেরুঃ শিখরিণাং গঙ্গা নদীনাং বসন্ত ঋতূনাং
ব্রহ্মা প্রজাপতীনামেবাসৌ মুখ্যো গাযত্র্যা গাযত্রী ছন্দো ভবতি ॥ ৩॥

কিং ভূঃ কিং ভুবঃ কিং স্বঃ কিং মহঃ কিং জনঃ কিং তপঃ কিং সত্যং
কিং তত্ কিং সবিতুঃ কিং বরেণ্যং কিং ভর্গঃ কিং দেবস্য কিং ধীমহি
কিং ধিযঃ কিং যঃ কিং নঃ কিং প্রচোদযাত্ ॥ ৪॥

ভূরিতি ভূর্লোকঃ ভুব ইত্যন্তরিক্ষলোকঃ ।
স্বরিতি স্বর্লোকো মহ ইতি মহর্লোকো জন ইতি জনো লোকস্তপ
ইতি তপোলোকঃ সত্যমিতি সত্যলোকঃ ।
ভূর্ভুবঃস্বরোমিতি ত্রৈলোক্যম্ ॥ ৫॥

তদসৌ তেজো যত্তেজসোঽগ্নির্দেবতা সবিতুরিত্যাদিত্যস্য বরেণ্যমিত্যন্নম্ ।
অন্নমেব প্রজাপতির্ভর্গ ইত্যাপঃ ।
আপো বৈ ভর্গ এতাবত্সর্বা দেবতা দেবস্যেন্দ্রো বৈ দেবযদ্দিবং
তদিন্দ্রস্তস্মাত্সর্বকৃত্ পুরুষো নাম বিষ্ণুঃ ॥ ৬॥

ধীমহি কিমধ্যাত্মং তত্পরমং পদমিত্যধ্যাত্মং যো ন ইতি পৃথিবী বৈ
যো নঃ প্রচোদযাত্ কাম ইমাঁল্লোকান্ প্রচ্যাবযন্ যো নৃশংস্যোঽস্তো-
ষ্যস্তত্পরমো ধর্ম ইত্যেষা গাযত্রী কিঙ্গোত্রা কত্যক্ষরা কতিপদা
কতিকুক্ষিঃ কতিশীর্ষা চ ॥ ৭॥

সাঙ্খ্যাযনসগোত্রা গাযত্রী চতুর্বিংশত্যক্ষরা ত্রিপদা
ষট্কুক্ষিঃ সাবিত্রী কশাস্ত্রযঃ পাদা ভবন্তি ॥ ৮॥

কাঽস্যাঃ কুক্ষিঃ কানি পঞ্চ শীর্ষাণি ।
ঋগ্বেদোঽস্যাঃ প্রথমঃ পাদো ভবতি যজুর্বেদো দ্বিতীযঃ
সামবেদস্তৃতীযঃ পূর্বা দিক্ প্রথমা কুক্ষির্ভবতি দক্ষিণা দ্বিতীযা
পশ্চিমা তৃতীযা উদীচী চতুর্থা ঊর্ধ্বা পঞ্চমী অধরা ষষ্ঠী
কুক্ষিঃ । ব্যাকরণমস্যাঃ প্রথমং শীর্ষং ভবতি শিক্ষা দ্বিতীযং
কল্পস্তৃতীযং নিরুক্তঃ জ্যোতিষামযনং পঞ্চমম্ ॥ ৯॥

কিং লক্ষণং কিমু চেষ্টিতং কিমুদাহৃতং কিমক্ষরং দৈবত্যম্ ॥ ১০॥

লক্ষণং মীমাংসা অথর্ববেদো বিচেষ্টিতম্ ।
ছন্দোবিধিরিত্যুদাহৃতম্ ॥ ১১॥

কো বর্ণঃ কঃ স্বরঃ ।
শ্বেতো বর্ণঃ ষট্ স্বরাণি ইমান্যক্ষরাণি দৈবতানি ভবন্তি
পূর্বা ভবতি গাযত্রী মধ্যমা সাবিত্রী পশ্চিমা সন্ধ্যা সরস্বতী ॥ ১২॥

প্রাতঃ সন্ধ্যা রক্তা রক্তপদ্মাসনস্থা রক্তাম্বরধরা
রক্তবর্ণা রক্তগন্ধানুলেপনা চতুর্মুখা অষ্টভুজা দ্বিনেত্রা
দণ্ডাক্ষমালাকমণ্ডলুস্রুক্স্রুবধারিণী সর্বাভরণভূষিতা কৌমারী
ব্রাহ্মী হংসবাহিনী ঋগ্বেদসংহিতা ব্রহ্মদৈবত্যা ত্রিপদা গাযত্রী
ষট্ক্রুক্ষিঃ পঞ্চশীর্ষা অগ্নিমুখা রুদ্রশিববিষ্ণুহৃদযা
ব্রহ্মকবচা সাঙ্খ্যাযনসগোত্রা ভূর্লোকব্যাপিনী অগ্নিস্তত্ত্বং
উদাত্তানুদাত্তস্বরিতস্বরমকার আত্মজ্ঞানে বিনিযোগঃ ।
ইত্যেষা গাযত্রী ॥ ১৩॥

মধ্যাহ্নসন্ধ্যা শ্বেতা শ্বেতপদ্মাসনস্থা শ্বেতাম্বরধরা
শ্বেতগন্ধানুলেপনা পঞ্চমুখী দশভুজা ত্রিনেত্রা শূলাক্ষমালা
কমণ্ডলুকপালধারিণী সর্বাভরণভূষিতা সাবিত্রী যুবতী মাহেশ্বরী
বৃষভবাহিনী যজুর্বেদসংহিতা রুদ্রদৈবত্যা ত্রিপদা সাবিত্রী ষট্কুক্ষিঃ
পঞ্চশীর্ষা অগ্নিমুখা রুদ্রশিখা ব্রহ্মকবচা ভারদ্বাজসগোত্রা
ভুবর্লোকব্যাপিনী বাযুস্তত্ত্বং উদাত্তানুদাত্তস্বরিতস্বরমকারঃ
শ্বেতবর্ণ আত্মজ্ঞানে বিনিযোগঃ । ইত্যেষা সাবিত্রী ॥ ১৪॥

সাযংসন্ধ্যা কৃষ্ণা কৃষ্ণপদ্মাসনস্থা কৃষ্ণাম্বরধরা
কৃষ্ণবর্ণা কৃষ্ণগন্ধানুলেপনা কৃষ্ণমাল্যাম্বরধরা
একমুখী চতুর্ভুজা দ্বিনেত্রা শঙ্খচক্রগদাপদ্মধারিণী
সর্বাভরণভূষিতা সরস্বতী বৃদ্ধা বৈষ্ণবী গরুডবাহিনী
সামবেদসংহিতা বিষ্ণুদৈবত্যা ত্রিপদা ষট্কুক্ষিঃ পঞ্চশীর্ষা
অগ্নিমুখা বিষ্ণুহৃদযা রুদ্রশিখা ব্রহ্মকবচা কাশ্যপসগোত্রা
স্বর্লোকব্যাপিনী সূর্যস্তত্ত্বমুদাত্তানুদাত্তস্বরিতমকারঃ কৃষ্ণবর্ণো
মোক্ষজ্ঞানে বিনিযোগঃ । ইত্যেষা সরস্বতী ॥ ১৫॥

রক্তা গাযত্রী শ্বেতা সাবিত্রী কৃষ্ণবর্ণা সরস্বতী ।
প্রণবো নিত্যযুক্তশ্চ ব্যাহৃতীষু চ সপ্তসু ॥ ১৬॥

সর্বেষামেব পাপানাং সঙ্করে সমুপস্থিতে ।
দশ শতং সমভ্যর্চ্য গাযত্রী পাবনী মহত্ ॥ ১৭॥

প্রহ্রাদোঽত্রির্বসিষ্ঠশ্চ শুকঃ কণ্বঃ পরাশরঃ ।
বিশ্বামিত্রো মহাতেজাঃ কপিলঃ শৌনকো মহান্ ॥ ১৮॥

যাজ্ঞবল্ক্যো ভরদ্বাজো জমদগ্নিস্তপোনিধিঃ ।
গৌতমো মুদ্গলঃ শ্রেষ্ঠো বেদব্যাসশ্চ লোমশঃ ॥ ১৯॥

অগস্ত্যঃ কৌশিকো বত্সঃ পুলস্ত্যো মাণ্ডুকস্তথা ।
দুর্বাসাস্তপসা শ্রেষ্ঠো নারদঃ কশ্যপস্তথা ॥ ২০॥

উক্তাত্যুক্তা তথা মধ্যা প্রতিষ্ঠান্যাসু পূর্বিকা ।
গাযত্র্যুষ্ণিগনুষ্টুপ্ চ বৃহতী পঙ্ক্তিরেব চ ॥ ২১॥

ত্রিষ্টুপ্ চ জগতী চৈব তথাতিজগতী মতা ।
শক্বরী সাতিপূর্বা যাদষ্ট্যত্যষ্টী তথৈব চ ।
ধৃতিশ্চাতিধৃতিশ্চৈব প্রকৃতিঃ কৃতিরাকৃতিঃ ॥ ২২॥

বিকৃতিঃ সঙ্কৃতিশ্চৈব তথাতিকৃতিরুত্কৃতিঃ ।
ইত্যেতাশ্ছন্দসাং সংজ্ঞাঃ ক্রমশো বচ্মি সাম্প্রতম্ ॥ ২৩॥

ভূরিতি ছেন্দো ভুব ইতি ছন্দঃ স্বরিতি ছন্দো
ভূর্ভুবঃস্বরোমিতি দেবী গাযত্রী ইত্যেতানি ছন্দাংসি প্রথমমাগ্নেযং
দ্বিতীযং প্রাজাপত্যং তৃতীযং সৌম্যং চতুর্থমৈশানং
পঞ্চমমাদিত্যং ষষ্ঠং বার্হস্পত্যং সপ্তমং পিতৃদৈবত্যমষ্টমং
ভগদৈবত্যং নবমমার্যমং দশমং সাবিত্রমেকাদশং ত্বাষ্ট্রং
দ্বাদশং পৌষ্ণং ত্রযোদশমৈন্দ্রাগ্নং চতুর্দশং বাযব্যং পঞ্চদশং
বামদৈবত্যং ষোডশং মৈত্রাবরুণং সপ্তদশমাঙ্গিরসমষ্টাদশং
বৈশ্বদেব্যমেকোনবিংশং বৈষ্ণবং বিংশং বাসবমেকবিংশং রৌদ্রং
দ্বাবিংশমাশ্বিনং ত্রযোবিংশং ব্রাহ্মং চতুর্বিশং সাবিত্রম্ ॥ ২৪॥

দীর্ঘান্স্বরেণ সংযুক্তান্ বিন্দুনাদসমন্বিতান্ ।
ব্যাপকান্বিন্যসেত্পশ্চাদ্দশপঙ্ক্ত্যক্ষরাণি চ ।
দ্রবুপুংস ইতি প্রত্যক্ষবীজানি ।
প্রহ্লাদিনী প্রভা সত্যা বিশ্বা ভদ্রা বিলাসিনী ।
প্রভাবতী জযা কান্তা শান্তা পদ্মা সরস্বতী ॥ ২৫॥

বিদ্রুমস্ফটিকাকারং পদ্মরাগসমপ্রভম্ ।
ইন্দ্রনীলমণিপ্রখ্যং মৌক্তিকং কুঙ্কুমপ্রভম্ ॥ ২৬॥

অঞ্জনাভং চ গাঙ্গেযং বৈডূর্যং চন্দ্রসন্নিভম্ ।
হারিদ্রং কৃষ্ণদুগ্ধাভং রবিকান্তিসমং ভবম্ ॥ ২৭॥

শুকপিচ্ছসমাকারং ক্রমেণ পরিকল্পযেত্ ।
পৃথিব্যাপস্তথা তেজো বাযুরাকাশ এব চ ॥ ২৮॥

গন্ধো রসশ্চ রূপং চ শব্দঃ স্পর্শস্তথৈব চ ॥ ২৯॥

ঘ্রাণং জিহ্বা চ চক্ষুশ্চ ত্বক্ শ্রোত্রং চ তথাপরম্ ।
উপস্থপাযুপাদাদি পাণির্বাগপি চ ক্রমাত্ ॥ ৩০॥

মনো বুদ্ধিরহঙ্কারমব্যক্তং চ যথাক্রমম্ ।
সুমুখং সম্পুটং চৈব বিততং বিস্তৃতং তথা ।
একমুখং চ দ্বিমুখং ত্রিমুখং চ চতুর্মুখম্ ॥ ৩১॥

পঞ্চমুখং ষণ্মুখং চাধোমুখং চৈব ব্যাপকম্ ।
অঞ্জলীকং ততঃ প্রোক্তং মুদ্রিতং তু ত্রযোদশম্ ॥ ৩২॥

শকটং যমপাশং চ গ্রথিতং সম্মুখোন্মুখম্ ।
প্রলম্বং মুষ্টিকং চৈব মত্স্যঃ কূর্মো বরাহকম্ ॥ ৩৩॥

সিংহাক্রান্তং মহাক্রান্তং মুদ্গরং পল্লবং তথা ।
এতা মুদ্রাশ্চতুর্বিশদ্গাযত্র্যাঃ সুপ্রতিষ্ঠিতাঃ ॥ ৩৪॥

ওঁ মূর্ঘ্নি সঙ্ঘাতে ব্রহ্মা বিষ্ণুর্ললাটে রুদ্রো ভ্রূমধ্যে
চক্ষুশ্চন্দ্রাদিত্যৌ কর্ণযোঃ শুক্রবৃহস্পতী নাসিকে বাযুদৈবত্যং
প্রভাতং দোষা উভে সন্ধ্যে মুখমগ্নির্জিহ্বা সরস্বতী গ্রীবা স্বাধ্যাযাঃ
স্তনযোর্বসবো বাহ্বোর্মরুতঃ হৃদযং পর্জন্যমাকাশমপরং
নাভিরন্তরিক্ষং কটিরিন্দ্রিযাণি জঘনং প্রাজাপত্যং কৈলাসমলযৌ
ঊরূ বিশ্বেদেবা জানুভ্যাং জান্বোঃ কুশিকৌ জঙ্ঘযোরযনদ্বযং সুরাঃ
পিতরঃ পাদৌ পৃথিবী বনস্পতির্গুল্ফৌ রোমাণি মুহূর্তাস্তে বিগ্রহাঃ
কেতুমাসা ঋতবঃ সন্ধ্যাকালত্রযমাচ্ছাদনং সংবত্সরো নিমিষঃ
অহোরাত্রাবাদিত্যচন্দ্রমসৌ সহস্রপরমাং দেবীং শতমধ্যাং
দশাপরাম্ । সহস্রনেত্রীং দেবীং গাযত্রীং শরণমহং প্রপদ্যে ॥ ৩৫॥

তত্সবিতুর্বরদায নমঃ তত্প্রাতরাদিত্যায নমঃ ।
সাযমধীযানো দিবসকৃতং পাপং নাশযতি ॥ ৩৬॥

প্রাতরধীযানো রাত্রিকৃতং পাপং নাশযতি ।
তত্সাযম্প্রাতঃ প্রযুঞ্জানোঽপাপো ভবতি ।
য ইদং গাযত্র্যথর্বশীর্ষং ব্রাহ্মণঃ প্রযতঃ পঠেত্ ।
চত্বারো বেদা অধীতা ভবন্তি ।
সর্বেষু তীর্থেষু স্নাতো ভবতি সর্বৈদেবৈর্জ্ঞাতো ভবতি ।
সর্বপ্রত্যূহাত্পূতো ভবতি ॥ ৩৭॥

অপেযপানাত্পূতো ভবতি ॥ ৩৮॥

অভক্ষ্যভক্ষণাত্পূতো ভবতি ।
অলেহ্যলেহনাত্পূতো ভবতি ।
অচোষ্যচোষণাত্পূতো ভবতি ।
সুরাপানাত্পূতো ভবতি ॥ ৩৯॥

সুবর্ণস্তেযাত্পূতো ভবতি ।
পঙ্ক্তিভেদনাত্পূতো ভবতি ।
পতিতসম্ভাষণাত্পূতো ভবতি ।
অনৃতবচনাত্পূতো ভবতি ।
গুরুতল্পগমনাত্পূতো ভবতি ।
অগম্যাগমনাত্পূতো ভবতি ।
বৃষলীগমনাত্পূতো ভবতি ॥ ৪০॥

ব্রহ্মহত্যাযাঃ পূতো ভবতি ।
ভ্রূণহত্যাযাঃ পূতো ভবতি ।
বীরহত্যাযাঃ পূতো ভবতি ।
অব্রহ্মচারী সুব্রহ্মচারী ভবতি ॥ ৪১॥

অনেনাথর্বর্শার্ষেণাধীতেন ক্রতুশতেনেষ্টং ভবতি ।
ষষ্টিসহস্রং গাযত্রী জপ্তা ভবতি ।
অষ্টৌ ব্রাহ্মণান্ গ্রাহযেদর্থসিদ্ধির্ভবতি ।
য ইদং গাযত্র্যথর্বশীর্ষং ব্রাহ্মণঃ প্রযতঃ পঠেত্ ।
স সর্বপাপৈঃ প্রমুচ্যতে ব্রহ্মলোকে মহীযতে ব্রহ্মলোকে মহীযতে ॥ ৪২॥

ইতি গাযত্র্যথর্বশীর্ষং সম্পূর্ণম্ ॥