Gayatri Vandana

ওঁকাররূপা ত্রিপদা ত্রযী চ ত্রিদেববন্দ্যা ত্রিদিবাধিদেবী ।
ত্রিলোককর্ত্রী ত্রিতযস্য ভর্ত্রী ত্রৈকালিকী সঙ্কলনাবিধাত্রী ॥ ১॥

ত্রৈগুণ্যভেদাত্ ত্রিবিধস্বরূপা ত্রৈবিধ্যযুক্তস্য ফলস্য দাত্রী ।
তথাপবর্গস্য বিধাযিনী ত্বং দযার্দ্রদৃক্কোণবিলোকনেন ॥ ২॥

ত্বং বাঙ্মযী বিশ্ববদান্যমূর্তির্বিশ্বস্বরূপাপি হি বিশ্বগর্ভা ।
তত্ত্বাত্মিকা তত্ত্বপরাত্পরা চ দৃক্তারিকা তারকশঙ্করস্য ॥ ৩॥
ভূতং চ ভব্যং সকলং যদেতত্ ত্বত্তঃ পরং কুত্র ন কিঞ্চিদস্তি ।
আদ্যামনাদ্যামনবদ্যবন্দ্যাং পধ্যন্তি বিজ্ঞাঃ প্রবদন্তি চ ত্বাম্ ॥ ৪॥

বিশ্বাত্মিকে বিশ্ববিলাসভূতে বিশ্বাশ্রযে বিশ্ববিকাশধামে ।
বিভূত্যধিষ্ঠাত্রি বিভূতিদাত্রি পদে ত্বদীযে প্রণতির্মদীযা ॥ ৫॥

ত্বং নিত্যসর্গস্য বিসর্গভূতা দৈনন্দিনস্যাপি চ প্রাকৃতস্য ।
বিশ্বস্য যোনির্হি মতা তথাপি সমুদ্রহৈমাদ্রিবিরঞ্চিজাতা ॥ ৬॥

ভোগস্য ভোক্ত্রী করণস্য কর্ত্রী ধাত্বাব্যযপ্রত্যযলিঙ্গশূন্যা ।
জ্ঞেযা ন বেদৈর্ন পুরাণভেদৈর্ধ্যেযা ধিযা ধারণযাদিশক্তিঃ ॥ ৭॥
কিঞ্চিদ্যদেতত্তবমূর্তিরেষা তথাপ্যদৃশ্যাখিলসাধনৈশ্চ ।
সান্তা নিরন্তা সদসত্স্বরূপা স্ফুটাস্ফুটা স্ফোটবিকাশরূপা ॥ ৮॥

যস্মিন্ যতো যস্য চ যেন যচ্চ কস্মিন্কুতঃ কস্য চ কেন কিঞ্চ ।
ইত্যাদিশব্দৈর্ন বিশোধনীযা কুতঃ কথং সা পরিবোধনীযা ॥ ৯॥

নিত্যা সদা সর্বগতাঽপ্যলক্ষ্যা বিষ্ণোর্বিধেঃ শঙ্করতোঽপ্যভিন্না ।
শক্তিস্বরূপা জগতোঽস্য শক্তির্জ্ঞাতুং ন শক্যা করণাদিভিস্ত্বম্ ॥ ১০॥

ত্যক্তস্ত্বযাত্যন্তনিরস্তবুদ্ধির্নরো ভবেদ্ বৈভবভাগ্যহীনঃ ।
হিমালযাদপ্যধিকোত্রতোঽপি জনৈস্সমস্তৈরপি লঙ্ঘনীযঃ ॥ ১১॥
শিবে হরৌ ব্রহ্মণি ভানুচন্দ্রযোশ্চরাচরে গোচরকেঽপ্যগোচরে ।
সূক্ষ্মাতিসূক্ষ্মে মহতো মহত্তমে কলা ত্বদীযা বিমলা বিরাজতে ॥ ১২॥

সুধামরন্দং তব পাদপদ্মং স্বে মানসে ধারণযা নিধায ।
বুদ্ধির্মিলিন্দীভবতান্মদীযা নাতঃ পরং দেবি বরং সমীহে ॥ ১৩॥

দীনেষু হীনেষু গতাদরেষু স্বাভাবিকী তে করুণা প্রসিদ্ধা ।
অতঃ শরণ্যে শরণং প্রপন্নং গৃহাণ মাতঃ প্রণযাঞ্জলিং মে ॥ ১৪॥

পঠতঃ শ‍ৃণ্বতো বাপি সকৃত্প্রণমতস্তথা ।
ভব্যায জগতো ভূযাত্ প্রণযস্যামঞ্জলিঃ ॥ ১৫॥

॥ ইতি গাযত্রীবন্দনা সমাপ্তা ॥