Gayatri Vandana

ૐકારરૂપા ત્રિપદા ત્રયી ચ ત્રિદેવવન્દ્યા ત્રિદિવાધિદેવી ।
ત્રિલોકકર્ત્રી ત્રિતયસ્ય ભર્ત્રી ત્રૈકાલિકી સઙ્કલનાવિધાત્રી ॥ ૧॥

ત્રૈગુણ્યભેદાત્ ત્રિવિધસ્વરૂપા ત્રૈવિધ્યયુક્તસ્ય ફલસ્ય દાત્રી ।
તથાપવર્ગસ્ય વિધાયિની ત્વં દયાર્દ્રદૃક્કોણવિલોકનેન ॥ ૨॥

ત્વં વાઙ્મયી વિશ્વવદાન્યમૂર્તિર્વિશ્વસ્વરૂપાપિ હિ વિશ્વગર્ભા ।
તત્ત્વાત્મિકા તત્ત્વપરાત્પરા ચ દૃક્તારિકા તારકશઙ્કરસ્ય ॥ ૩॥
ભૂતં ચ ભવ્યં સકલં યદેતત્ ત્વત્તઃ પરં કુત્ર ન કિઞ્ચિદસ્તિ ।
આદ્યામનાદ્યામનવદ્યવન્દ્યાં પધ્યન્તિ વિજ્ઞાઃ પ્રવદન્તિ ચ ત્વામ્ ॥ ૪॥

વિશ્વાત્મિકે વિશ્વવિલાસભૂતે વિશ્વાશ્રયે વિશ્વવિકાશધામે ।
વિભૂત્યધિષ્ઠાત્રિ વિભૂતિદાત્રિ પદે ત્વદીયે પ્રણતિર્મદીયા ॥ ૫॥

ત્વં નિત્યસર્ગસ્ય વિસર્ગભૂતા દૈનન્દિનસ્યાપિ ચ પ્રાકૃતસ્ય ।
વિશ્વસ્ય યોનિર્હિ મતા તથાપિ સમુદ્રહૈમાદ્રિવિરઞ્ચિજાતા ॥ ૬॥

ભોગસ્ય ભોક્ત્રી કરણસ્ય કર્ત્રી ધાત્વાવ્યયપ્રત્યયલિઙ્ગશૂન્યા ।
જ્ઞેયા ન વેદૈર્ન પુરાણભેદૈર્ધ્યેયા ધિયા ધારણયાદિશક્તિઃ ॥ ૭॥
કિઞ્ચિદ્યદેતત્તવમૂર્તિરેષા તથાપ્યદૃશ્યાખિલસાધનૈશ્ચ ।
સાન્તા નિરન્તા સદસત્સ્વરૂપા સ્ફુટાસ્ફુટા સ્ફોટવિકાશરૂપા ॥ ૮॥

યસ્મિન્ યતો યસ્ય ચ યેન યચ્ચ કસ્મિન્કુતઃ કસ્ય ચ કેન કિઞ્ચ ।
ઇત્યાદિશબ્દૈર્ન વિશોધનીયા કુતઃ કથં સા પરિબોધનીયા ॥ ૯॥

નિત્યા સદા સર્વગતાઽપ્યલક્ષ્યા વિષ્ણોર્વિધેઃ શઙ્કરતોઽપ્યભિન્ના ।
શક્તિસ્વરૂપા જગતોઽસ્ય શક્તિર્જ્ઞાતું ન શક્યા કરણાદિભિસ્ત્વમ્ ॥ ૧૦॥

ત્યક્તસ્ત્વયાત્યન્તનિરસ્તબુદ્ધિર્નરો ભવેદ્ વૈભવભાગ્યહીનઃ ।
હિમાલયાદપ્યધિકોત્રતોઽપિ જનૈસ્સમસ્તૈરપિ લઙ્ઘનીયઃ ॥ ૧૧॥
શિવે હરૌ બ્રહ્મણિ ભાનુચન્દ્રયોશ્ચરાચરે ગોચરકેઽપ્યગોચરે ।
સૂક્ષ્માતિસૂક્ષ્મે મહતો મહત્તમે કલા ત્વદીયા વિમલા વિરાજતે ॥ ૧૨॥

સુધામરન્દં તવ પાદપદ્મં સ્વે માનસે ધારણયા નિધાય ।
બુદ્ધિર્મિલિન્દીભવતાન્મદીયા નાતઃ પરં દેવિ વરં સમીહે ॥ ૧૩॥

દીનેષુ હીનેષુ ગતાદરેષુ સ્વાભાવિકી તે કરુણા પ્રસિદ્ધા ।
અતઃ શરણ્યે શરણં પ્રપન્નં ગૃહાણ માતઃ પ્રણયાઞ્જલિં મે ॥ ૧૪॥

પઠતઃ શ‍ૃણ્વતો વાપિ સકૃત્પ્રણમતસ્તથા ।
ભવ્યાય જગતો ભૂયાત્ પ્રણયસ્યામઞ્જલિઃ ॥ ૧૫॥

॥ ઇતિ ગાયત્રીવન્દના સમાપ્તા ॥