Gayatri Vandana

ಓಂಕಾರರೂಪಾ ತ್ರಿಪದಾ ತ್ರಯೀ ಚ ತ್ರಿದೇವವನ್ದ್ಯಾ ತ್ರಿದಿವಾಧಿದೇವೀ ।
ತ್ರಿಲೋಕಕರ್ತ್ರೀ ತ್ರಿತಯಸ್ಯ ಭರ್ತ್ರೀ ತ್ರೈಕಾಲಿಕೀ ಸಙ್ಕಲನಾವಿಧಾತ್ರೀ ॥ ೧॥

ತ್ರೈಗುಣ್ಯಭೇದಾತ್ ತ್ರಿವಿಧಸ್ವರೂಪಾ ತ್ರೈವಿಧ್ಯಯುಕ್ತಸ್ಯ ಫಲಸ್ಯ ದಾತ್ರೀ ।
ತಥಾಪವರ್ಗಸ್ಯ ವಿಧಾಯಿನೀ ತ್ವಂ ದಯಾರ್ದ್ರದೃಕ್ಕೋಣವಿಲೋಕನೇನ ॥ ೨॥

ತ್ವಂ ವಾಙ್ಮಯೀ ವಿಶ್ವವದಾನ್ಯಮೂರ್ತಿರ್ವಿಶ್ವಸ್ವರೂಪಾಪಿ ಹಿ ವಿಶ್ವಗರ್ಭಾ ।
ತತ್ತ್ವಾತ್ಮಿಕಾ ತತ್ತ್ವಪರಾತ್ಪರಾ ಚ ದೃಕ್ತಾರಿಕಾ ತಾರಕಶಙ್ಕರಸ್ಯ ॥ ೩॥
ಭೂತಂ ಚ ಭವ್ಯಂ ಸಕಲಂ ಯದೇತತ್ ತ್ವತ್ತಃ ಪರಂ ಕುತ್ರ ನ ಕಿಞ್ಚಿದಸ್ತಿ ।
ಆದ್ಯಾಮನಾದ್ಯಾಮನವದ್ಯವನ್ದ್ಯಾಂ ಪಧ್ಯನ್ತಿ ವಿಜ್ಞಾಃ ಪ್ರವದನ್ತಿ ಚ ತ್ವಾಮ್ ॥ ೪॥

ವಿಶ್ವಾತ್ಮಿಕೇ ವಿಶ್ವವಿಲಾಸಭೂತೇ ವಿಶ್ವಾಶ್ರಯೇ ವಿಶ್ವವಿಕಾಶಧಾಮೇ ।
ವಿಭೂತ್ಯಧಿಷ್ಠಾತ್ರಿ ವಿಭೂತಿದಾತ್ರಿ ಪದೇ ತ್ವದೀಯೇ ಪ್ರಣತಿರ್ಮದೀಯಾ ॥ ೫॥

ತ್ವಂ ನಿತ್ಯಸರ್ಗಸ್ಯ ವಿಸರ್ಗಭೂತಾ ದೈನನ್ದಿನಸ್ಯಾಪಿ ಚ ಪ್ರಾಕೃತಸ್ಯ ।
ವಿಶ್ವಸ್ಯ ಯೋನಿರ್ಹಿ ಮತಾ ತಥಾಪಿ ಸಮುದ್ರಹೈಮಾದ್ರಿವಿರಞ್ಚಿಜಾತಾ ॥ ೬॥

ಭೋಗಸ್ಯ ಭೋಕ್ತ್ರೀ ಕರಣಸ್ಯ ಕರ್ತ್ರೀ ಧಾತ್ವಾವ್ಯಯಪ್ರತ್ಯಯಲಿಙ್ಗಶೂನ್ಯಾ ।
ಜ್ಞೇಯಾ ನ ವೇದೈರ್ನ ಪುರಾಣಭೇದೈರ್ಧ್ಯೇಯಾ ಧಿಯಾ ಧಾರಣಯಾದಿಶಕ್ತಿಃ ॥ ೭॥
ಕಿಞ್ಚಿದ್ಯದೇತತ್ತವಮೂರ್ತಿರೇಷಾ ತಥಾಪ್ಯದೃಶ್ಯಾಖಿಲಸಾಧನೈಶ್ಚ ।
ಸಾನ್ತಾ ನಿರನ್ತಾ ಸದಸತ್ಸ್ವರೂಪಾ ಸ್ಫುಟಾಸ್ಫುಟಾ ಸ್ಫೋಟವಿಕಾಶರೂಪಾ ॥ ೮॥

ಯಸ್ಮಿನ್ ಯತೋ ಯಸ್ಯ ಚ ಯೇನ ಯಚ್ಚ ಕಸ್ಮಿನ್ಕುತಃ ಕಸ್ಯ ಚ ಕೇನ ಕಿಞ್ಚ ।
ಇತ್ಯಾದಿಶಬ್ದೈರ್ನ ವಿಶೋಧನೀಯಾ ಕುತಃ ಕಥಂ ಸಾ ಪರಿಬೋಧನೀಯಾ ॥ ೯॥

ನಿತ್ಯಾ ಸದಾ ಸರ್ವಗತಾಽಪ್ಯಲಕ್ಷ್ಯಾ ವಿಷ್ಣೋರ್ವಿಧೇಃ ಶಙ್ಕರತೋಽಪ್ಯಭಿನ್ನಾ ।
ಶಕ್ತಿಸ್ವರೂಪಾ ಜಗತೋಽಸ್ಯ ಶಕ್ತಿರ್ಜ್ಞಾತುಂ ನ ಶಕ್ಯಾ ಕರಣಾದಿಭಿಸ್ತ್ವಮ್ ॥ ೧೦॥

ತ್ಯಕ್ತಸ್ತ್ವಯಾತ್ಯನ್ತನಿರಸ್ತಬುದ್ಧಿರ್ನರೋ ಭವೇದ್ ವೈಭವಭಾಗ್ಯಹೀನಃ ।
ಹಿಮಾಲಯಾದಪ್ಯಧಿಕೋತ್ರತೋಽಪಿ ಜನೈಸ್ಸಮಸ್ತೈರಪಿ ಲಙ್ಘನೀಯಃ ॥ ೧೧॥
ಶಿವೇ ಹರೌ ಬ್ರಹ್ಮಣಿ ಭಾನುಚನ್ದ್ರಯೋಶ್ಚರಾಚರೇ ಗೋಚರಕೇಽಪ್ಯಗೋಚರೇ ।
ಸೂಕ್ಷ್ಮಾತಿಸೂಕ್ಷ್ಮೇ ಮಹತೋ ಮಹತ್ತಮೇ ಕಲಾ ತ್ವದೀಯಾ ವಿಮಲಾ ವಿರಾಜತೇ ॥ ೧೨॥

ಸುಧಾಮರನ್ದಂ ತವ ಪಾದಪದ್ಮಂ ಸ್ವೇ ಮಾನಸೇ ಧಾರಣಯಾ ನಿಧಾಯ ।
ಬುದ್ಧಿರ್ಮಿಲಿನ್ದೀಭವತಾನ್ಮದೀಯಾ ನಾತಃ ಪರಂ ದೇವಿ ವರಂ ಸಮೀಹೇ ॥ ೧೩॥

ದೀನೇಷು ಹೀನೇಷು ಗತಾದರೇಷು ಸ್ವಾಭಾವಿಕೀ ತೇ ಕರುಣಾ ಪ್ರಸಿದ್ಧಾ ।
ಅತಃ ಶರಣ್ಯೇ ಶರಣಂ ಪ್ರಪನ್ನಂ ಗೃಹಾಣ ಮಾತಃ ಪ್ರಣಯಾಞ್ಜಲಿಂ ಮೇ ॥ ೧೪॥

ಪಠತಃ ಶ‍ೃಣ್ವತೋ ವಾಪಿ ಸಕೃತ್ಪ್ರಣಮತಸ್ತಥಾ ।
ಭವ್ಯಾಯ ಜಗತೋ ಭೂಯಾತ್ ಪ್ರಣಯಸ್ಯಾಮಞ್ಜಲಿಃ ॥ ೧೫॥

॥ ಇತಿ ಗಾಯತ್ರೀವನ್ದನಾ ಸಮಾಪ್ತಾ ॥