Shri Gajendra Moksha Path

SrISuka uvAca
evaM vyavasito budDyA samADAya manohfdi .
jajApa paramaM jApyaM prAgjanmanyanuSikzitam .. 1..

gajendra uvAca
namo Bagavate tasmE yata etaccidAtmakam .
puruzAyAdibIjAya pareSAyABiDImahi .. 2..

yasminnidaM yataScedaM yenedaM ya idaM svayam .
yo'smAtparasmAcca parastaM prapadye svayamBuvam .. 3..

yaH svAtmanIdaM nijamAyayArpitaM
kvacidviBAtaM kva ca tattirohitam .
avidDadfk sAkzyuBayaM tadIkzate
sa AtmamUlo'vatu mAM parAtparaH .. 4..

kAlena paYcatvamitezu kftsnaSo
lokezu pAlezu ca sarvahetuzu .
tamastadA''sIdgahanaM gaBIraM
yastasya pAre'BivirAjate viBuH .. 5..

na yasyadevA fzayaHpadaM vidu-
rjantuH punaH ko'rhati gantumIritum .
yaTA nawasyAkftiBirvicezwato
duratyayAnukramaRaH sa mAvatu .. 6..

didfkzavo yasya padaM sumaNgalaM
vimukta saNgA munayaH susADavaH .
carantyalokavratamavraRaM vane
BUtAtmaBUtAH suhfdaH sa me gatiH .. 7..

na vidyate yasya ca janma karma vA
na nAmarUpe guRadoza eva vA .
taTApi lokApyayasamBavAya yaH
svamAyayA tAnyanukAlamfcCati .. 8..

tasmE namaH pareSAya brahmaRe'nantaSaktaye .
arUpAyorurUpAya nama AScaryakarmaRe .. 9..

nama AtmapradIpAya sAkziRe paramAtmane .
namo girAM vidUrAya manasaScetasAmapi .. 10..

sattvena pratilaByAya nEzkarmyeRa vipaScitA .
namaH kEvalyanATAya nirvARasuKasaMvide .. 11..

namaH SAntAya GorAya mUQAya guRaDarmiRe .
nirviSezAya sAmyAya namo jYAnaGanAya ca .. 12..

kzetrajYAya namastuByaM sarvADyakzAya sAkziRe .
puruzAyAtmamUlAya mUlaprakftaye namaH .. 13..

sarvendriyaguRadfzwe sarva pratyaya hetave .
asatAcCAyayoktAya sadABAsAya te namaH .. 14..

namo namaste'KilakAraRAya
nizkAraRAyAdButakAraRAya .
sarvAgamAmnAyamahArRavAya
namo'pavargAya parAyaRAya .. 15..

guRAraRicCannacidUzmapAya
tatkzoBavisPUrjitamAnasAya .
nEzkarmyaBAvena vivarjitAgama-
svayaMprakASAya namaskaromi .. 16..

mAdfkprapannapaSupASavimokzaRAya
muktAya BUrikaruRAya namo'layAya ..

svAMSena sarvatanuBfnmanasi pratIta-
pratyagdfSe Bagavate bfhate namaste .. 17..

AtmA''tmajAptagfhavittajanezu saktE-
rduzprApaRAya guRasaNgavivarjitAya .
muktAtmaBiH svahfdaye pariBAvitAya
jYAnAtmane Bagavate nama ISvarAya .. 18..

yaM DarmakAmArTavimuktikAmA
Bajanta izwAM gatimApnuvanti .
kiM tvASizo rAtyapi dehamavyayaM
karotu me'daBradayo vimokzaRam .. 19..

ekAntino yasya na kaYcanArTaM
vAYCanti ye vE BagavatprapannAH .
atyadButaM taccaritaM sumaNgalaM
gAyanta AnandasamudramagnAH .. 20..

tamakzarambrahma paraM pareSa-
mavyaktamADyAtmikayogagamyam .
atIndriyaM sUkzmamivAtidUra-
manantamAdyaM paripUrRamIqe .. 21..

yasya brahmAdayo devA vedA lokAScarAcarAH .
nAmarUpaviBedena PalgvyA ca kalayA kftAH .. 22..

yaTArcizo'gneH saviturgaBastayo
niryAnti saMyAntyasakftsvarocizaH .
taTA yato'yaM guRasampravAho
budDirmanaH KAni SarIrasargAH .. 23..

sa vE na devAsuramartyatiryaN
na strI na zaRqo na pumAnna jantuH .
nAyaM guRaH karma na sanna cAsan
nizeDaSezo jayatAdaSezaH .. 24..

jijIvize nAhamihAmuyA ki-
mantarbahiScAvftayeBayonyA .
icCAmi kAlena na yasya viplava-
stasyAtmalokAvaraRasya mokzam .. 25..

so'haM viSvasfjaM viSvamaviSvaM viSvavedasam .
viSvAtmAnamajaM brahma praRato'smi paraM padam .. 26..

yogaranDitakarmARo hfdi yogaviBAvite .
yogino yaM prapaSyanti yogeSaM taM nato'smyaham .. 27..

namo namastuByamasahya vega-
SaktitrayAyAKilaDIguRAya .
prapannapAlAya durantaSaktaye
kadindriyARAmanavApyavartmane .. 28..

nAyaM veda svamAtmAnaM yacCaktyAhanDiyA hatam .
taM duratyayamAhAtmyaM Bagavantamito'smyaham .. 29..

SrISuka uvAca
evaM gajendramupavarRitanirviSezaM
brahmAdayo viviDaliNgaBidABimAnAH .
nEte yadopasasfpurniKilAtmakatvAt
tatrAKilAmaramayo harirAvirAsIt .. 30..

taM tadvadArttamupalaBya jagannivAsaH
stotraM niSamya divijEH saha saMstuvaBiH .
Candomayena garuqena samuhyamAna-
ScakrAyuDo'ByagamadASu yato gajendraH .. 31..

so'ntassarasyurubalena gfhIta Artto
dfzwvA garutmati hariM Ka upAttacakram .
utkzipya sAmbujakaraM giramAha kfcCrA-
nnArAyaRAKilaguro Bagavan namaste .. 32..

taM vIkzya pIqitamajaH sahasAvatIrya
sagrAhamASu sarasaH kfpayojjahAra .
grAhAdvipAwitamuKAdariRA gajendraM
sampaSyatAM hariramUmucadustriyARAm .. 33..

iti SrImadBAgavate mahApurarARe saMhitAyAmazwaskanDe
SrIgajendramokzaRaM nAma tftIyo'DyAyaH ..