Shri Ganpati Mangal Malika Stotram with Meaning

ശ്രീകണ്ഠപ്രേമപുത്രായ ഗൌരീവാമാങ്ഗവാസിനേ ।
ദ്വാത്രിംശദ്രൂപയുക്തായ ശ്രീഗണേശായ മങ്ഗലമ് ॥ ൧॥

ആദിപൂജ്യായ ദേവായ ദന്തമോദകധാരിണേ ।
വല്ലഭാപ്രാണകാന്തായ ശ്രീഗണേശായ മങ്ഗലമ് ॥ ൨॥

ലമ്ബോദരായ ശാന്തായ ചന്ദ്രഗര്വാപഹാരിണേ ।
ഗജാനനായ പ്രഭവേ ശ്രീഗണേശായ മങ്ഗലമ് ॥ ൩॥

പഞ്ചഹസ്തായ വന്ദ്യായ പാശാങ്കുശധരായ ച ।
ശ്രീമതേ ഗജകര്ണായ ശ്രീഗണേശായ മങ്ഗലമ് ॥ ൪॥

ദ്വൈമാതുരായ ബാലായ ഹേരമ്ബായ മഹാത്മനേ ।
വികടായാഖുവാഹായ ശ്രീഗണേശായ മങ്ഗലമ് ॥ ൫॥

പൃഷ്ണിശ‍ൃങ്ഗായാജിതായ ക്ഷിപ്രാഭീഷ്ടാര്ഥദായിനേ ।
സിദ്ധിബുദ്ധിപ്രമോദായ ശ്രീഗണേശായ മങ്ഗലമ് ॥ ൬॥

വിലമ്ബിയജ്ഞസൂത്രായ സര്വവിഘ്നനിവാരിണേ ।
ദൂര്വാദലസുപൂജ്യായ ശ്രീഗണേശായ മങ്ഗലമ് ॥ ൭॥

മഹാകായായ ഭീമായ മഹാസേനാഗ്രജന്മനേ ।
ത്രിപുരാരീ വരോ ധാത്രേ ശ്രീഗണേശായ മങ്ഗലമ് ॥ ൮॥

സിന്ദൂരരമ്യവര്ണായ നാഗബദ്ധോദരായ ച ।
ആമോദായ പ്രമോദായ ശ്രീഗണേശായ മങ്ഗലമ് ॥ ൯॥

വിഘ്നകര്ത്രേ ദുര്മുഖായ വിഘ്നഹര്ത്രേ ശിവാത്മനേ ।
സുമുഖായൈകദന്തായ ശ്രീഗണേശായ മങ്ഗലമ് ॥ ൧൦॥

സമസ്തഗണനാഥായ വിഷ്ണവേ ധൂമകേതവേ ।
ത്ര്യക്ഷായ ഭാലചന്ദ്രായ ശ്രീഗണേശായ മങ്ഗലമ് ॥ ൧൧॥

ചതുര്ഥീശായ മാന്യായ സര്വവിദ്യാപ്രദായിനേ ।
വക്രതുണ്ഡായ കുബ്ജായ ശ്രീഗണേശായ മങ്ഗലമ് ॥ ൧൨॥

തുണ്ഡിനേ കപിലാക്ഷായ ശ്രേഷ്ഠായ ഋണഹാരിണേ ।
ഉദ്ദണ്ഡോദ്ദണ്ഡരൂപായ ശ്രീഗണേശായ മങ്ഗലമ് ॥ ൧൩॥

കഷ്ടഹര്ത്രേ ദ്വിദേഹായ ഭക്തേഷ്ടജയദായിനേ ।
വിനായകായ വിഭവേ ശ്രീഗണേശായ മങ്ഗലമ് ॥ ൧൪॥

സച്ചിദാനന്ദരൂപായ നിര്ഗുണായ ഗുണാത്മനേ ।
വടവേ ലോകഗുരവേ ശ്രീഗണേശായ മങ്ഗലമ് ॥ ൧൫॥

ശ്രീചാമുണ്ഡാസുപുത്രായ പ്രസന്നവദനായ ച ।
ശ്രീരാജരാജസേവ്യായ ശ്രീഗണേശായ മങ്ഗലമ് ॥ ൧൬॥

ശ്രീചാമുണ്ഡാകൃപാപാത്ര ശ്രീകൃഷ്ണേന്ദ്രവിനിര്മിതാമ് ।
വിഭൂതിമാതൃകാരമ്യാം കല്യാണൈശ്വര്യദായിനീമ് ॥ ൧൭॥

ശ്രീമഹാഗണനാഥസ്യ ശുഭാം മങ്ഗലമാലികാമ് ।
യഃ പഠേത് സതതം വാണീം ലക്ഷ്മീം സിദ്ധിമവാപ്നുയാത് ॥ ൧൮॥

ഇതി ശ്രീകൃഷ്ണേന്ദ്രരചിതം ശ്രീഗണപതിമങ്ഗലമാലികാസ്തോത്രം സമ്പൂര്ണമ് ।

You May Also Like