Shri Ganesh Puja Vidhi

బ్రహ్మోవాచ ।
శ‍ృణు రాజన్ ! ప్రవక్ష్యామి సర్వసిద్ధిప్రదం వ్రతమ్ ॥ ౬॥

యస్యానుష్ఠానమాత్రేణ చిన్తితం ప్రాప్నుయాన్నరః ।
ఓషధీభిః శుక్లతిలైర్దివా స్నాయాత్ ప్రసన్నధీః ॥ ౭॥

సఙ్కల్పం కారయేత్ సమ్యగ్ ధ్యాత్వా దేవం గజాననమ్ ।
గణేశ పూజయేద్ భక్త్యా మన్త్రైరాగమసమ్భవైః ॥ ౮॥

కృష్ణపక్షే చతుర్థ్యాఞ్చ నిశి చన్ద్రోదయేఽపి చ ।
నృప ఉవాచ ।
కథం సమ్పూజయేద్ బ్రహ్మన్ ! దేవదేవం గజాననమ్ ॥ ౯॥

విస్తరేణ మమ బ్రూహి ప్రణయాత్ పరిపృచ్ఛతే ।
బ్రహ్మోవాచ ।
నిత్యకర్మ సమాప్యాఽథ నిశాయాముదయే విధోః ॥ ౧౦॥

శుచౌ దేశే గోమయేన లిప్తే మణ్డపికాన్వితే ।
తత్ర పీఠం గణేశస్య పూజయేత్ కుఙ్కుమాక్షతైః ॥ ౧౧॥

స్థాపయేత్ కలశం తత్ర పఞ్చరత్నసమన్వితమ్ ।
తస్యోపరి న్యసేత్పాత్రం సౌవర్ణకలశాన్వితమ్ ॥ ౧౨॥

తదభావే తు రౌప్యం వా తామ్రం వైణవమేవ చ ।
తస్యోపరి న్యసేద్ వస్త్రం క్షౌమం వా శక్తిసంయుతః ॥ ౧౩॥

తస్యోపరి లిఖేద్యన్త్రమాగమోక్తవిధానతః ।
తత్ర మూర్తిం గణేశస్య సౌవర్ణీ లక్షణాన్వితామ్ ॥ ౧౪॥

ధ్యానమ్ -
ఏకదన్తం మహాకాయం తప్తకాఞ్చనసన్నిభమ్ ।
లమ్బోదరం విశాలాక్షం జ్వలత్పావకలోచనమ్ ॥ ౧౫॥

ఆఖుపృష్ఠసమారూఢఞ్చామరైర్వీజితం గణైః ।
శేషయజ్ఞోపవీతఞ్చ చిన్తయేత్ తం గజాననమ్ ॥ ౧౬॥

ఆవాహనమ్ -
ఆగచ్ఛ దేవదేవేశ ! సఙ్కటాన్మాం నివారయ ।
యావద్ వ్రతం సమాప్యేత తావత్ త్వం సన్నిధౌ భవ ॥ ౧౭॥
(పురుషసూక్తే
అథవా
ఓం సహస్రశీర్షా పురుషః సహస్రాక్షః సహస్రపాత్ ।
స భూమిం విశ్వతో వృత్వా అత్యతిష్ఠద్దశాఙ్గులమ్ ॥)

ఆసనమ్ -
గణాధీశ ! నమస్తేఽస్తు సర్వసిద్ధిప్రదాయక !।
ఆసనం గృహ్యతాం దేవ సఙ్కటాన్మాం నివారయ ॥ ౧౮॥
(అథవా
పురుష ఏవేదగుం సర్వం యద్భూతం యచ్ఛ భవ్యమ్ ।
ఉతామృతత్వస్యేశానః యదన్నేనాతిరోహతి ॥)

పాద్యమ్ -
ఉమాపుత్ర ! నమస్తేఽస్తు నమస్తే మోదకప్రియ ! ।
పాద్యం గృహాణ దేవేశ సఙ్కటం మే నివారయ ॥ ౧౯॥
(అథవా
ఏతావానస్య మహిమా అతో జ్యాయాగంశ్చ పూరుషః ।
పాదోఽస్య విశ్వా భూతాని త్రిపాదస్యామృతం దివి ॥)

అర్ఘ్యమ్ -
లమ్బోదర ! నమస్తేఽస్తు రత్నయుక్తం ఫలాన్వితమ్ ।
అర్ఘ్యం గృహాణ దేవేశ ! సఙ్కటం మే నివారయ ॥ ౨౦॥
(అథవా
త్రిపాదూర్ధ్వ ఉదైత్పురుషః పాదోఽస్యేహాభవాత్పునః ।
తతో విశ్వఙ్వ్యక్రామత్ సాశనానశనే అభి ॥)

ఆచమనీయమ్ -
గఙ్గాది సర్వతీర్థేభ్యః ఆహృతం తోయముత్తమమ్ ।
గృహాణాఽఽచమనీయార్థం సఙ్కటం మే నివారయ ॥ ౨౧॥
(అథవా
తస్మాద్విరాడజాయత విరాజో అధి పూరుషః ।
స జాతో అత్యరిచ్యత పశ్చాద్భూమి మథో పురః ॥)

పఞ్చామృతమ్ -
పయో దధి ఘృతఞ్చైవ శర్కరామధుసంయుతమ్ ।
పఞ్చామృతం గృహాణేదం సఙ్కటం మే నివారయ ॥ ౨౨॥
(అథవా
పయః పృథివ్యాం పయ ఓషధీషు పయో దివ్యన్తరిక్షే పయో ధాః ।
పయస్వతీః ప్రదిశః సన్తు మహ్యమ్ ॥)

స్నానమ్ -
నర్మదా చన్ద్రభాగా చ గఙ్గాసఙ్గమజైర్జలైః ।
స్నాపితోఽసి మయా భక్త్యా సఙ్కటం మే నివారయ ॥ ౨౩॥
(అథవా
యత్పురుషేణ హవిషా దేవా యజ్ఞమతన్వత ।
వసన్తో అస్యాసీదాజ్యం గ్రీష్మ ఇధ్మశ్శరద్ధవిః ॥)

వస్త్రయుగ్మమ్ -
ఇభవక్త్ర ! నమస్తుభ్యం గృహాణ పరమేశ్వర ! ।
వస్త్రయుగ్మం గణాధ్యక్ష ! సఙ్కటం మే నివారయ ॥ ౨౪॥
(అథవా
తం యజ్ఞం బర్హిషి ప్రౌక్షన్ పురుషం జాతమగ్రతః ।
తేన దేవా అయజన్త సాధ్యా ఋషయశ్చ యే ॥)

యజ్ఞోపవీతమ్ -
వినాయక ! నమస్తుభ్యం నమః పరశుధారిణే ! ।
ఉపవీత గృహాణేదం సఙ్కటాం మే నివారయ ॥ ౨౫॥
(అథవా
తస్మాద్యజ్ఞాత్సర్వహుతః సమ్భృతం పృషదాజ్యమ్ ।
పశూగుఁస్తాగంశ్చక్రే వాయవ్యాన్ ఆరణ్యాన్ గ్రామ్యాశ్చయే ॥)

చన్దనమ్ -
ఈశపుత్ర ! నమస్తుభ్యం నమో మూషకవాహన ! ।
చన్దనం గృహ్యతాం దేవ సఙ్కటం మే నివారయ ॥ ౨౬॥
(అథవా
తస్మాద్యజ్ఞాత్సర్వహుతః ఋచః సామాని జజ్ఞిరే ।
ఛన్దాఁగసి జజ్ఞిరే తస్మాత్ యజుస్తస్మాదజాయత ॥)

అక్షతాః -
ఘృతకుఙ్కుమసంయుక్తాస్తన్దులాః సుమనోహరాః ।
అక్షతాస్తే నమస్తుభ్యం సఙ్కటం మే నివారయ ॥ ౨౭॥
(అథవా
అక్షన్నమీమదన్త హ్యవ ప్రియా అధూషత ।
అస్తోషత స్వభానవో విప్రా నవిష్ఠయా మతీ యోజాన్విన్ద్ర తే హరీ ॥)

పుష్పమ్ -
చమ్పకం మల్లికా దూర్వాః పుష్పజాతిరనేకశః ।
గృహాణ త్వం గణాధ్యక్ష ! సఙ్కటం మే నివారయ ॥ ౨౮॥
(అథవా
తస్మాదశ్వా అజాయన్త యే కే చోభయాదతః ।
గావో హ జజ్ఞిరే తస్మాత్ తస్మాజ్జాతా అజావయః ॥)

ధూపమ్ -
లమ్బోదర ! మహాకాయ ! ధూమ్రకేతో ! సువాసితమ్ ।
ధూపం గృహాణ దేవేశ ! సఙ్కటం మే నివారయ ॥ ౨౯॥
(అథవా
యత్పురుషం వ్యదధుః కతిధా వ్యకల్పయన్ ।
ముఖం కిమస్య కౌ బాహూ కావూరు పాదావుచ్యేతే ॥)

దీపమ్ -
విఘ్నాన్ధకారసంహారకారక ! త్రిదశాధిప ! ।
దీపం గృహాణ దేవేశ ! సఙ్కటం మే నివారయ ॥ ౩౦॥
(అథవా
బ్రాహ్మణోస్య ముఖమాసీత్ బాహూ రాజన్యః కృతః ।
ఊరు తదస్య యద్వైశ్యః పద్భ్యాం శూద్రో అజాయత ॥)

నైవేద్యమ్ -
మోదకాపూపలడ్డూకపాయసం శర్కరాన్వితమ్ ।
పక్వాన్నం సఘృతం దేవ ! నైవేద్యం ప్రతిగృహ్యతామ్ ॥ ౩౧॥
(అథవా
చంద్రమా మనసో జాతః చక్షోః సూర్యో అజాయత ।
ముఖాదిన్ద్రశ్చాగ్నిశ్చ ప్రాణాద్వాయురజాయత ॥)

ఫలమ్ -
నారికేల ఫలం ద్రాక్షాం రసాలం దాడిమం శుభమ్ ।
ఫలం గృహాణ దేవేశ ! సఙ్కటం మే నివారయ ॥ ౩౨॥
(అథవా
నాభ్యా ఆసీదన్తరిక్షం శీర్ష్ణో ద్యౌః సమవర్తత ।
పదభ్యాం భూమిర్దిశః శ్రోత్రాత్ తథా లోకాంగ అకల్పయన్ ॥)

తామ్బూలమ్ -
క్రముకైలా లవఙ్గాది నాగవల్లీదలాని చ ।
తామ్బూలం గృహ్యతాం దేవ ! సఙ్కటం మే వినాశయ ॥ ౩౩॥
(అథవా
పూగిఫలం సతామ్బూలం నాగవల్లి దలైర్యుతమ్ ।
తామ్బూలం గృహ్యతాం దేవ యేల లవఙ్గ సంయుక్తమ్ ॥)

దక్షిణా -
సర్వప్రీతికరం దేవ ! హిరణ్యం సర్వసిద్ధిదమ్ ।
దక్షిణార్థం గృహాణేదం సఙ్కటం మే వినాశయ ॥ ౩౪॥
(అథవా
సప్తాస్యాసన్ పరిధయస్త్రిః సప్త సమిధః కృతాః ।
దేవా యద్యజ్ఞం తన్వానా అబధ్నన్ పురుషం పశుమ్ ॥
వా
హిరణ్య గర్భ గర్భస్థ హేమబీజ విభావసోః ।
అనంత పుణ్య ఫలదా అథః శాంతిం ప్రయశ్చ మే ॥)

ఏకవింశతిదూర్వాఙ్కురుమర్పణ్ ।
తతో దూర్వాఙ్కురాన్ గృహ్య వింశత్యేకఞ్చ భక్తితః ।
ఏభిర్నామపదేర్దేవమర్చయేత్ సుసమాహితః ॥ ౩౫॥

దూర్వాపణమన్త్రా -
గణాధిపతయే నమః । ౧। ఉమాపుత్రాయ నమః । ౨। అఘనాశనాయ నమః । ౩।
ఏకదన్తాయ నమః । ౪। ఇభవక్త్రాయ నమః । ౫। మూషకవాహనాయ నమః । ౬।
వినాయకాయ నమః । ౭। ఈశపుత్రాయ నమః । ౮। సర్వసిద్ధిప్రదాయ నమః । ౯।
లమ్బోదరాయ నమః । ౧౦। వక్రతుణ్డాయ నమః । ౧౧। మోదకప్రియాయ నమః । ౧౨।
విఘ్నవిధ్వంసకర్త్రే నమః । ౧౩। విశ్వవన్ద్యాయ నమః । ౧౪।
అమరేశాయ నమః । ౧౫। గజకర్ణాయ నమః । ౧౬।
నాగయజ్ఞోపవీతినే నమః । ౧౭। భాలచన్ద్రాయ నమః । ౧౮।
పరశుధారిణే నమః । ౧౯। విఘ్నాధిపాయ నమః । ౨౦। విద్యాప్రదాయ నమః । ౨౧।

నీరాజనమ్ -
కర్పూరానలసంయుక్తం శేషాఘౌఘవినాశనమ్ ।
నీరాజనం గృహాణేశ ! సఙ్కటాన్మాం విమోచయ ॥ ౩౬॥
(అథవా
ఓం ఆ రాత్రి పార్థివఁ రజః పితురప్రాయి ధామభిః ।
దివః సదాఁసి బృహతీ వి తిష్ఠస ఆ త్వేషం వర్తతే తమః ।)

పుష్పాఞ్జలి -
చమ్పకాశోకబకులపారిజాతభవైః శుభైః ।
పుష్పాఞ్జలిం గృహాణేమాం సఙ్కటాన్మాం విమోచయ ॥ ౩౭॥
(అథవా
యజ్ఞేన యజ్ఞమయజన్త దేవాః తాని ధర్మాణి ప్రథమాన్యాసన్ ।
తే హ నాకం మహిమానః సచన్తే యత్ర పూర్వే సాధ్యాః సన్తి దేవాః ॥)

స్తుతిః -
త్వమేవ విశ్వం సృజసీభవక్త్ర ! త్వమేవ విశ్వం పరిపాసి దేవ ! ।
త్వమేవ విశ్వం హరసేఽఖిలేశ ! త్వమేవ విశ్వాత్మక ! ఆవిభాసి ॥ ౩౮॥

నమస్కారా -
నమామి దేవం గణనాథమీశం విఘ్నేశ్వరం విఘ్నవినాశదక్షమ్ ।
భక్తార్తిహం భక్తివిమోక్షదక్షం, విద్యాప్రదం వేదనిధానమాద్యమ్ ॥ ౩౯॥

ప్రదక్షిణా -
ఏవం స్తువీత విధివత ప్రణమేత పునః పునః ।
ప్రదక్షిణాం ప్రకుర్వీత యథా శక్త్యైకవింశతిమ్ ॥ ౪౦॥

ప్రార్థనా -
యే త్వామసమ్పూజ్య గణేశ ! నూనం వాఞ్ఛన్తి మూఢా విహితార్థసిద్ధిమ్ ।
త ఏవ నష్టా నియతం హి లోకే జ్ఞాతో మయా తే సకలః ప్రభావః ॥ ౪౧॥

వాయనం -
ఆచార్యస్త్వం ద్విజాధ్యక్ష ! సర్వసిద్ధిప్రదాయక ! ।
వాయనం గృహ్యతాం బ్రహ్మన్ ! సఙ్కటాన్మాం నివారయ ॥ ౪౨॥

విశేషార్ఘ్యం -
ఫలపుష్పాక్షతైర్యుక్తం జలం తే దక్షిణాన్వితమ్ ।
విశేషార్ఘ్యం మయా దత్తం సఙ్కటాన్మాం నివారయ ॥ ౪౩॥

॥ ఇతి షోడశోపచారార్చనమ్ ॥

గణేశమన్త్రార్చనమ్ -
ఓం నమో హేరమ్బ మదమోదిత మమ సఙ్కటం నివారయ స్వాహా ।
ఇన్ద్రాది లోకపాలాఁశ్చ సమన్తాత్ పూజయేత్ సుధీః ॥ ౪౪॥

పక్వముద్గతిలైర్యుక్తాన్ మోదకాన్ ఘృతపాచితాన్ ।
భక్ష్యాన్యన్యాని తామ్బూలం యథాశక్తి ప్రకల్పయేత్ ॥ ౪౫॥

తతో దూర్వాఙ్కురాన్గృహ్య వింశత్యేకఞ్చ భక్తితః ।
ఏభిర్నామపదైర్దేవమర్చయేత్ సుసమాహితః ॥ ౪౬॥

గణాధిప ! నమస్తుభ్యముమాపుత్రాభయప్రద ! ।
ఏకదన్తేభవక్త్రేతి తథా మూషకవాహన ! ॥ ౪౭॥

వినాయకేశపుత్రేతి సర్వసిద్ధిప్రదాయక ! ।
లమ్బోదర ! నమస్తుభ్యం వక్రతుణ్డాఘనాశన ! ॥ ౪౮॥

విఘ్నవిధ్వంసకర్తేతి విశ్వవన్ద్యామరేశ్వర ! ।
గజవక్ర ! నమస్తుభ్యం నాగయజ్ఞోపవీతినే ! ॥ ౪౯॥

భాలచన్ద్ర ! నమస్తుభ్యం నమః పరశుధారిణే ।
విఘ్నాధిప ! నమస్తుభ్యం సర్వవిద్యాప్రదాయక ॥ ౫౦॥

ఏవం సమ్పూజయేద్దేవం దూర్వాభిశ్చ పృథక్ పృథక్ ।
యదుద్దిశ్య కృతం సమ్యగ్ యథాశక్తి ప్రపూజనమ్ ॥ ౫౧॥

తేన తుష్టో భవాశు త్వం హృత్స్థాన్కామాన్ప్రపూరయ ।
విఘ్నాన్నాశయ మే సర్వాన్ దుష్టాంశ్చ సముపస్థితాన్ ॥ ౫౨॥

త్వత్ప్రసాదేన సర్వాణి కార్యాణీహ కరోమ్యహమ్ ।
శత్రూణాం బుద్ధినాశఞ్చ మిత్రాణాముదయం కురు ॥ ౫౩॥

ఇతి విజ్ఞాప్య దేవేశం ప్రణిపత్య పునః పునః ।
తతో హోమం ప్రకుర్వీత శతమష్టోత్తరం వ్రతీ ॥ ౫౪॥

మోదకైర్వాయనం కార్యం వ్రతసమ్పూర్తిహేతవే ।
లడ్డూకైర్వటకాద్యైర్వా త్రిసప్తఫలసంయుతమ్ ॥ ౫౫॥

రక్తవస్త్రేణ సఞ్చ్ఛాద్య స్వాచార్యాయ నివేదయేత్ ।
గణాధిప ! నమస్తుభ్యం సర్వసఙ్కల్పసిద్ధిద ! ॥ ౫౬॥

వాయనస్య ప్రదానేన సఙ్కటాన్మాం నివారయ ।

తిథ్యర్ఘ్యం -
కథాం శ్రుత్వా తతః పుణ్యాం దద్యాదర్ఘ్యం సమాహితః ॥ ౫౭॥

తిథీనాముత్తమే ! దేవి ! గణేశప్రియవల్లభే ! ।
సఙ్కటం హర మే దేవి గృహాణార్ఘ్యం నమోఽస్తు తే ॥ ౫౮॥

దేవార్ఘ్యం -
లమ్బోదర ! నమస్తుభ్యం సతతం మోదకప్రియ ! ।
సఙ్కటం హర మే దేవ గృహాణార్ఘ్యం నమోఽస్తు తే ॥ ౫౯॥

చన్ద్రార్ఘ్యం -
చన్ద్రాయ సప్తవారం తు మన్త్రేణానేన పార్థివ ! ।
క్షారోదార్ణవసమ్భూత ! అత్రిగోత్రసముద్భవ ! ।
గృహాణార్ఘ్యం మయా దత్తం రోహిణ్యా సహితః శశిన్ ॥ ౬౦॥

తతః క్షమాపయేద్దేవం తతో విప్రాంశ్చ భోజయేత్ ।
స్వయం భుఞ్జీత తచ్ఛేషం బ్రాహ్మణభ్యో యదర్పితమ్ ॥ ౬౧॥

సప్తగ్రాసాన్ మౌనయుక్తో యథాశక్త్యా యథాసుఖమ్ ।
ఇత్థం కుర్యాత్తు మాసేషు చతుర్ష్వపి విధానతః ॥ ౬౨॥

ఇతి శ్రీగణేశపూజావిధి సమ్పూర్ణా ॥