Select Language AssameseBalineseBengaliBurmeseChamCyrillicDevanagari (Hindi)IAST (English)GujaratiGurmukhiJavaneseKannadaKhamti shanKhmerLaoLepchaLimbuMalayalamManipuriMonMroOriyaRohingyaShanSinhalaTamilTeluguThaiTibetanUrduGondi gunjalaGondi masaramOl chikiSora sompengTakriTirhuta maithiliWanchoWarang citiTagbanwaItransIsoHkSlp1

zrImadAtmane guNaikasindhave namaH zivAya
dhAmalezadhUtakokabandhave namaH zivAya |
nAmazeSitAnamadbhAvAndhave namaH zivAya
pAmaretarapradhAnabandhave namaH zivAya || 1||

kAlabhItaviprabAlapAla te namaH zivAya
zUlabhinnaduSTadakSaphAla te namaH zivAya |
mUlakAraNAya kAlakAla te namaH zivAya
pAlayAdhunA dayAlavAla te namaH zivAya || 2||

iSTavastumukhyadAnahetave namaH zivAya
duSTadaityavaMzadhUmaketave namaH zivAya |
sRSTirakSaNAya dharmasetave namaH zivAya
aSTamUrtaye vRSendraketave namaH zivAya || 3||

ApadadribhedaTaGkahasta te namaH zivAya
pApahAridivyasindhumasta te namaH zivAya |
pApadAriNe lasannamastate namaH zivAya
zApadoSakhaNDanaprazasta te namaH zivAya || 4||

vyomakeza divyabhavyarUpa te namaH zivAya
hemamedinIdharendracApa te namaH zivAya |
nAmamAtradagdhasarvapApa te namaH zivAya
kAmanaikatAnahRddurApa te namaH zivAya || 5||

brahmamastakAvalInibaddha te namaH zivAya
jihmagendrakuNDalaprasiddha te namaH zivAya |
brahmaNe praNItavedapaddhate namaH zivAya
jiMhakAladehadattapaddhate namaH zivAya || 6||

kAmanAzanAya zuddhakarmaNe namaH zivAya
sAmagAnajAyamAnazarmaNe namaH zivAya |
hemakAnticAkacakyavarmaNe namaH zivAya
sAmajAsurAGgalabdhacarmaNe namaH zivAya || 7||

janmamRtyughoraduHkhahAriNe namaH zivAya
cinmayaikarUpadehadhAriNe namaH zivAya |
manmanorathAvapUrtikAriNe namaH zivAya
sanmanogatAya kAmavairiNe namaH zivAya || 8||

yakSarAjabandhave dayAlave namaH zivAya
dakSapANizobhikAJcanAlave namaH zivAya |
pakSirAjavAhahRcchayAlave namaH zivAya
akSiphAla vedapUtatAlave namaH zivAya || 9||

dakSahastaniSThajAtavedase namaH zivAya
akSarAtmane namadbiDaujase namaH zivAya |
dIkSitaprakAzitAtmatejase namaH zivAya
ukSarAjavAha te satAM gate namaH zivAya || 10||

rAjatAcalendrasAnuvAsine namaH zivAya
rAjamAnanityamandahAsine namaH zivAya |
rAjakorakAvataMsabhAsine namaH zivAya
rAjarAjamitratAprakAzine namaH zivAya || 11||

dInamAnavAlikAmadhenave namaH zivAya
sUnabANadAhakRtkRzAnave namaH zivAya |
svAnurAgabhaktaratnasAnave namaH zivAya
dAnavAndhakAracaNDabhAnave namaH zivAya || 12||

sarvamaGgalAkucAgrazAyine namaH zivAya
sarvadevatAgaNAtizAyine namaH zivAya |
pUrvadevanAzasaMvidhAyine namaH zivAya
sarvamanmanojabhaGgadAyine namaH zivAya || 13||

stokabhaktito'pi bhaktapoSiNe namaH zivAya
mAkarandasAravarSibhASiNe namaH zivAya |
ekabilvadAnato'pi toSiNe namaH zivAya
naikajanmapApajAlazoSiNe namaH zivAya || 14||

sarvajIvarakSaNaikazIline namaH zivAya
pArvatIpriyAya bhaktapAline namaH zivAya |
durvidagdhadaityasainyadAriNe namaH zivAya
zarvarIzadhAriNe kapAline namaH zivAya || 15||

pAhi mAmumAmanojJadeha te namaH zivAya
dehi me varaM sitAdrigeha te namaH zivAya |
mohitarSikAminIsamUha te namaH zivAya
svehitaprasanna kAmadoha te namaH zivAya || 16||

maGgalapradAya goturaMga te namaH zivAya
gaGgayA taraGgitottamAGga te namaH zivAya |
saGgarapravRttavairibhaGga te namaH zivAya
aGgajAraye karekuraGga te namaH zivAya || 17||

IhitakSaNapradAnahetave namaH zivAya
AhitAgnipAlakokSaketave namaH zivAya |
dehakAntidhUtaraupyadhAtave namaH zivAya
gehaduHkhapuJjadhUmaketave namaH zivAya || 18||

tryakSa dInasatkRpAkaTAkSa te namaH zivAya
dakSasaptatantunAzadakSa te namaH zivAya |
RkSarAjabhAnupAvakAkSa te namaH zivAya
rakSa mAM prapannamAtrarakSa te namaH zivAya || 19||

nyaGkupANaye zivaMkarAya te namaH zivAya
saMkaTAbdhitIrNakiMkarAya te namaH zivAya |
kaGkabhISitAbhayaMkarAya te namaH zivAya
paGkajAnanAya zaMkarAya te namaH zivAya || 20||

karmapAzanAza nIlakaNTha te namaH zivAya
zarmadAya naryabhasmakaNTha te namaH zivAya |
nirmamarSisevitopakaNTha te namaH zivAya
kurmahe natIrnamadvikuNTha te namaH zivAya || 21||

viSTapAdhipAya namraviSNave namaH zivAya
ziSTaviprahRdguhAcariSNave namaH zivAya |
iSTavastunityatuSTajiSNave namaH zivAya
kaSTanAzanAya lokajiSNave namaH zivAya || 22||

aprameyadivyasuprabhAva te namaH zivAya
satprapannarakSaNasvabhAva te namaH zivAya |
svaprakAza nistulAnubhAva te namaH zivAya
vipraDimbhadarzitArdrabhAva te namaH zivAya || 23||

sevakAya me mRDa prasIda te namaH zivAya
bhAvalabhya tAvakaprasAda te namaH zivAya |
pAvakAkSa devapUjyapAda te namaH zivAya
tavakAGghribhaktadattamoda te namaH zivAya || 24||

bhuktimuktidivyabhogadAyine namaH zivAya
zaktikalpitaprapaJcabhAgine namaH zivAya |
bhaktasaMkaTApahArayogine namaH zivAya
yuktasanmanaHsarojayogine namaH zivAya || 25||

antakAntakAya pApahAriNe namaH zivAya
zAntamAyadanticarmadhAriNe namaH zivAya |
saMtatAzritavyathAvidAriNe namaH zivAya
jantujAtanityasaukhyakAriNe namaH zivAya || 26||

zUline namo namaH kapAline namaH zivAya
pAline viriJcituNDamAline namaH zivAya |
lIline vizeSaruNDamAline namaH zivAya
zIline namaH prapuNyazAline namaH zivAya || 27||

zivapaJcAkSaramudrAM
catuSpadollAsapadyamaNighaTitAm |
nakSatramAlikAmiha
dadhadupakaNThaM naro bhavetsomaH || 28||

iti zrImatparamahaMsaparivrAjakAcAryasya
zrIgovindabhagavatpUjyapAdaziSyasya
zrImacchaMkarabhagavataH kRtau
zivapaJcAkSaranakSatramAlAstotraM saMpUrNam ||