Select Language AssameseBalineseBengaliBurmeseChamCyrillicDevanagari (Hindi)IAST (English)GujaratiGurmukhiJavaneseKannadaKhamti shanKhmerLaoLepchaLimbuMalayalamManipuriMonMroOriyaRohingyaShanSinhalaTamilTeluguThaiTibetanUrduGondi gunjalaGondi masaramOl chikiSora sompengTakriTirhuta maithiliWanchoWarang citiTagbanwaItransIsoHkSlp1

bhavAni stotuM tvAM prabhavati chaturbhirna vadanaiH
prajAnAmIshAnastripuramathanaH pa~nchabhirapi |
na ShaDbhiH senAnIrdashashatamukhairapyahipatiH
tadAnyeShAM keShAM kathaya kathamasminnavasaraH || 1||

ghRRitakShIradrAkShAmadhumadhurimA kairapi padaiH
vishiShyAnAkhyeyo bhavati rasanAmAtra viShayaH |
tathA te saundaryaM paramashivadRRi~NmAtraviShayaH
kathaMkAraM brUmaH sakalanigamAgocharaguNe || 2||

mukhe te tAmbUlaM nayanayugaLe kajjalakalA
lalATe kAshmIraM vilasati gaLe mauktikalatA |
sphuratkA~nchI shATI pRRithukaTitaTe hATakamayI
bhajAmi tvAM gaurIM nagapatikishorImaviratam || 3||

virAjanmandAradrumakusumahArastanataTI
nadadvINAnAdashravaNavilasatkuNDalaguNA
natA~NgI mAta~NgI ruchiragatibha~NgI bhagavatI
satI shambhorambhoruhachaTulachakShurvijayate || 4||

navInArkabhrAjanmaNikanakabhUShaNaparikaraiH
vRRitA~NgI sAra~NgIruchiranayanA~NgIkRRitashivA |
taDitpItA pItAmbaralalitama~njIrasubhagA
mamAparNA pUrNA niravadhisukhairastu sumukhI || 5||

himAdreH saMbhUtA sulalitakaraiH pallavayutA
supuShpA muktAbhirbhramarakalitA chAlakabharaiH |
kRRitasthANusthAnA kuchaphalanatA sUktisarasA
rujAM hantrI gantrI vilasati chidAnandalatikA || 6||

saparNAmAkIrNAM katipayaguNaiH sAdaramiha
shrayantyanye vallIM mama tu matirevaM vilasati |
aparNaikA sevyA jagati sakalairyatparivRRitaH
purANo.api sthANuH phalati kila kaivalyapadavIm || 7||

vidhAtrI dharmANAM tvamasi sakalAmnAyajananI
tvamarthAnAM mUlaM dhanadanamanIyAMghrikamale |
tvamAdiH kAmAnAM janani kRRitakandarpavijaye
satAM mukterbIjaM tvamasi paramabrahmamahiShI || 8||

prabhUtA bhaktiste yadapi na mamAlolamanasaH
tvayA tu shrImatyA sadayamavalokyo.ahamadhunA |
payodaH pAnIyaM dishati madhuraM chAtakamukhe
bhRRishaM sha~Nke kairvA vidhibhiranunItA mama matiH || 9||

kRRipApA~NgAlokaM vitara tarasA sAdhucharite
na te yuktopekShA mayi sharaNadIkShAmupagate |
na chediShTaM dadyAdanupadamaho kalpalatikA
visheShaH sAmAnyaiH kathamitaravallIparikaraiH || 10||

mahAntaM vishvAsaM tava charaNapa~Nkeruhayuge
nidhAyAnyannaivAshritamiha mayA daivatamume |
tathApi tvachcheto yadi mayi na jAyeta sadayaM
nirAlambo lambodarajanani kaM yAmi sharaNam || 11||

ayaH sparshe lagnaM sapadi labhate hemapadavIM
yathA rathyApAthaH shuchi bhavati gaMgaughamilitam |
tathA tattatpApairatimalinamantarmama yadi
tvayi premNAsaktaM kathamiva na jAyeta vimalam || 12||

tvadanyasmAdichChAviShayaphalalAbhe na niyamaH
tvamarthAnAmichChAdhikamapi samarthA vitaraNe |
iti prAhuH prA~nchaH kamalabhavanAdyAstvayi manaH
tvadAsaktaM naktaM divamuchitamIshAni kuru tat || 13||

sphurannAnAratnasphaTikamayabhittipratiphala
ttvadAkAraM cha~nchachChashadharakalAsaudhashikharam |
mukundabrahmendraprabhRRitiparivAraM vijayate
tavAgAraM ramyaM tribhuvanamahArAjagRRihiNi || 14||

nivAsaH kailAse vidhishatamakhAdyAH stutikarAH
kuTumbaM trailokyaM kRRitakarapuTaH siddhinikaraH |
maheshaH prANeshastadavanidharAdhIshatanaye
na te saubhAgyasya kvachidapi manAgasti tulanA || 15||

vRRiSho vRRiddho yAnaM viShamashanamAshA nivasanaM
shmashAnaM krIDAbhUrbhujaganivaho bhUShaNavidhiH
samagrA sAmagrI jagati viditaiva smararipoH
yadetasyaishvaryaM tava janani saubhAgyamahimA || 16||

asheShabrahmANDapralayavidhinaisargikamatiH
shmashAneShvAsInaH kRRitabhasitalepaH pashupatiH |
dadhau kaNThe hAlAhalamakhilabhUgolakRRipayA
bhavatyAH saMgatyAH phalamiti cha kalyANi kalaye || 17||

tvadIyaM saundaryaM niratishayamAlokya parayA
bhiyaivAsIdgaMgA jalamayatanuH shailatanaye |
tadetasyAstasmAdvadanakamalaM vIkShya kRRipayA
pratiShThAmAtanvannijashirasivAsena girishaH || 18||

vishAlashrIkhaNDadravamRRigamadAkIrNaghusRRiNa
prasUnavyAmishraM bhagavati tavAbhya~Ngasalilam |
samAdAya sraShTA chalitapadapAMsUnnijakaraiH
samAdhatte sRRiShTiM vibudhapurapa~NkeruhadRRishAm || 19||

vasante sAnande kusumitalatAbhiH parivRRite
sphurannAnApadme sarasi kalahaMsAlisubhage |
sakhIbhiH khelantIM malayapavanAndolitajale
smaredyastvAM tasya jvarajanitapIDApasarati || 20||

|| iti shrImachCha~NkarAchAryavirachitA AnandalaharI sampUrNA ||